رواية اتقابلنا صدفة
- لا انتي مش شكل بنت مش محترمه..شكلك هب0له
= اه عندك حق انا فعلا هبـ..ايه؟ لا انا مش هبله!
- عبيطه طيب؟
= اهو انت الي عبيط وستين عبيط..انت جاي تعكرلي مزاجي؟
- حد قالك تقوليلي اجي؟
= مكنتش اعرف انك مستفز!
- كويس اديكي عرفتي..
بتقرأي ايه؟
= ملكش دعوه..عمومًا انا اتأخرت ولازم امشي
- مش هشوفك تاني؟
= بكون موجودة هنا كل يوم
مشيت..اتبسطت انه جه مع اني معرفهوش ولا حتي هو كان يعرفني..ايه اللي يخلي واحد يغيب يوم من شغله علشان يقعد مع واحده هو ميعرفهاش؟
واضح اني مش هبله لوحدي..
فضلت اروح الكافيه كل يوم زي عادتي بس مكنتش بلاقيه، كنت بحس اني مضايقه، مكنش بيوحشني بس مكنتش عايزه افضل لوحدي..
عدا 3 اسابيع مشوفتهوش فيهم وفقدت الامل انه يجي
سمعت صوت الكرسي بيتشد ف عرفت انه جه..
- صالحني
= اصالحك؟
- اه مانت بقالك كتير مبتجيش وبفضل قاعدة لوحدي ودا شئ يستدعي انك تصالحني
= ولو مصالحتكيش؟
- هنادي علي الجارسون واقوله انك بتطفل عليا وقاعد علي نفس الترابيزه من غير موافقتي ف هيقولك تقعد علي ترابيزه تانيه ولو موافقتش هيضطر يقولك تمشي
= طب مش تسأليني الاول مكنتش باجي ليه؟
- اممم..طيب..مكنتش بتيجي ليه؟
= كنت في تركيا
- تركيا؟
= اه سفريه تبع شغلي
- الله..ان شاء الله المره الجاية تاخدني معاك..انا قررت خلاص
= تيجي تعيشي حياتي بدالي؟ تيجي والله؟
- بتتريق؟
= اصل دا مش كلام ناس عاقلين يعني؟
- قصدك اني مجنونه؟
= انا مقولتش كدا
- اه بس اكيد قولت كدا في سرك
= سري وانا حر فيه
- لا سرك ميجيبش سيرتي علي لسانه،احسن والله ا..اا..اقطعه واخليك ماشي من غير سر كدا والناس تقول اللي من غير سر راح اللي من غير سر جه
= ما علينا..شكلك حلو النهاردة
- انا ديمًا شكلي حلو
= لا هتتغري شويه كمان هقوم امشي
- بجد شكلي حلو؟
= اه وشعرك شكله جميل
- اه منا حطاله زيت غالي..فاكرني بستخدم حاجات مش غالية؟ لا دا انا بنت ناس اوي لعلمك
ضحك وبعدين قالي بتقرأي ايه بقا؟
- بقرأ رواية لـ حسن الجندى
= بتحبي تقرأيله؟
- اه بحب اقرأله اوي
= القراءه حاجة حلوة جدًا..المهم انا مضطر امشي علشان لو اتأخرت عن كدا هيطردوني من الشغل
- طيب وايه يعني ما تطرد علشاني؟
= انا ماشي يا هدي قبل ما اشتم
- متقدرش تشتمني اصلًا لعلمك
= ليه هتضربيني؟
- لا هعيط
فضل يبصلي ويضحك
- هعيط لو شتمتني والله مبهزرش!
= متخافيش انا محترم..سلام
تاني يوم جه بدري يقعد معايا قبل شغله
- هو انت ليه بتتعب نفسك وتيجي بدري وبعدين تروح شغلك؟ قصدي ليه غاوي فرهده لنفسك؟
= بحس بأنبساط وانا قاعد معاكي، انتي بقا بتيجي تقعدي هنا كل يوم بدري ليه؟
- خلصت دراسه من فتره، ومعنديش صحاب ف بتبسط لما بكون هنا وبستمتع بالقراءه هنا
= اممم..طيب علفكرا انا جبتلك هديه علشان اصالحك
- تجيبلي هديه ليه انت تعرفني؟ قصدي هتصاحبني يعني؟
