التميمه بقلم الكاتب إسماعيل موسى
قبل عشر سنين لقيت عمله معدنيه مدفونه فى التراب وانا بلعب فى الشارع قدام البيت كنت فاكرها عمله معدنيه لكن لما مسكتها لقيت شكلها غريب خدتها على البيت وركنتها على الرف وعدت الايام والسنين ونستها لما عمرى وصل ١٩ سنه توفى جدى وكنا بننقل الأغراض من غرفته وبالصدفه العمله المعدنيه سقطت على الأرض مسكتها وبصيت عليها وافتكرت ايام زمان لما لقيتها فى الشارع فيه حاجه غريبه شدتنى لشكلها ونقوشها عشان كده نضفتها وغسلت الصداء إلى فيها بالغاز لحد ما لمعت كان مرسوم عليها حجات غريبه وجميله زهره وبنت صغيره جدا وأشكال تانيه معرفتهاش كانت منقوشه بدقه مزهله تخليك تسرح فى جمالها وخدتها معايا غرفة نومى وركنتها على الطاوله جنبى انا بصحى متأخر عشان كده دايما اختى الصغيره بتدخل غرفتى عشان تصحينى وكمان تلعب معايا شويه اختى بتعمل ضجه كبيره لما بتدخل لكن اليوم دا ان فقت من النوم لوحدى اختى الصغيره كانت واقفه جنب سريرى بتبص على العمله المعدنيه
كوكى قالت انا هنا من وقت طويل من اكتر من ساعه
فتحت عنيه باستنكار بطلى هزار يا كوكى انت واقفه جنب سريرى من ساعه من غير ما تعملى اى صوت مستحيل
كوكى قالت كنت ببص على البنت الصغيره!
كوكى قالت البنت إلى فى العمله المعدنيه كانت بترقص رقص حلو اوى
مش عارفه بتعمل كده ازاى
بتعمل ايه يا كوكى
بتطير فى الجو يا سمسم وبعد كده ترجع مكانها والزهره دي كانت خضره كأنها حقيقيه
كوكى زعلت وحسيت انها هتدمع كوكى مش بتعرف تكدب وكمان ملامح وشها مكنتش بتهزر
اتعدلت كده وبصيت على العمله النحاسيه بس يا كوكى زى ما أنتى شايفه مفيش حاجه بتتحرك فى العمله
سمعت صړاخ والدتى بره الغرفه ...............
مش كفايه ساعه لعب. انا حضرت الفطار اكتر من مره
كلمة ساعة رنت فى ودنى وخلتنى انهض وأطلع اقعد على الطبليه وكوكى اتأخرت شويه
سألت امى هو كوكى كانت فى غرفتى ساعه كامله
والدتى بصتلى وقالت ما انت مش بتبطل لعب معاها هعمل ايه يعنى
خلصنا أكل ودخلت غرفتى وقفلت الباب على نفسى كيان طرقت الباب كانت عايزه تدخل اتحججت بالمذاكره وضعت القطعه المعدنيه فى يدى مجرد قطعة نحاس منقوشه فتحت شبكة الإنترنت وقعدت ابحث عن المعادن النادره والعملات المفقوده بحثت بأكتر من كلمه وطريقه مكنش فيه اى حاجه عنها الكلام المكتوب على العمله بلغه مش معروفه بالنسبه ليا وحاولت اعرف اللغه ايه! فرعونى ولا رومانى ولا حتى لغه منقرضه كانت النتيجه صفر.
اخدت العمله معايا وانا نازل الجامعه ودخلت على دكتور تاريخ فى كلية الآداب قلت يمكن يفدنى
الدكتور درس العمله قدامى واخبرنى انه عمره ما شاف عمله زى كده استبعد انها تكون عمله نقديه
دى ممكن
