رواية " ملاكي البرئ " بقلم إسراء إبراهيم ( جميع الفصول )

جاسر بص لندي شوية وسرح في كلامها عن براء وانه فعلا مش بيتعامل معاها كدة ولا فارق معاه هي زي ما براء اساسية في حياته،،ولفت انتباهه اكتر جملة ندي اللي قالتها من غير ما تقصد:

تعرف انا لو فعلا مكنتش عارفة حكاية براء بنت خالتك وانك انت اللي مربيها من وهي صغيرة كنت شكيت انك بتحبها،،ماهو كل ده تصرفات واحد بيحب مش مجرد وصي

قام جاسر بعد ما خلصت ندي كلامها وقالها بهدوء وهو مقرر يقعد مع نفسه لانه محتاج ده ومحتاج انه يصارح نفسه بحجات كتير:

لو سمحتي يا ندي بلاش كلام ملوش لزوم ويلا عشان اوصلك واروح انا كمان لاني تعبان

نفخت ندي بضيق من اسلوبه وطريقته معاها وخصوصا انها مجبرة تستحمله لانه شخص مناسب بالنسبالها من ناحية الماديات ويمكن هو ده الشئ الوحيد اللي مصبرها عليه وعلي طريقته معاها،، مشيت جنبه بهدوء وهي من جواها بتلعن في براء لانها متأكدة انها ليها علاقة بحالته دي

كانت براء قاعدة عالسرير في اوضتها وحاطة وشها بين ايديها لحد ما دخلت عليها منال بعد ما خبطت ووقتها مسحت براء دموعها بسرعة وحاولت ميبانش عليها الزعل بس منال خدت بالها وقعدت قدامها وهي بتقولها بابتسامة:

اعتقد اني سبتك بما فيه الكفايه لانك كنتي منهارة اول ما جيتي العصر بس دلوقتي بقي حبيبتي هتحكيلي ايه اللي كان مزعلها اوي كدة

براء بصت لمنال بحزن وفجأة رمت نفسها في حضنها لانها مقدرتش تستحمل وكانت محتاجة تتكلم اوي فبقت تعيط وهي بتتكلم بحزن: 

ابيه جاسر زعلني اوي مع اني معملتش حاجة،،انا بعمل كل اللي هو بيقولي عليه وبسمع كلامه،، وانهاردة عشان جه الجامعة وشافني قاعدة مع زميلي بشرحله جزء معين طلب مساعدتي فيه،، اتعصب عليا وزعقلي،، هو ليه بيعمل معايا كدة،، ليه دايما مش بحس انه بيحبني

كانت منال بتسمع براء بغموض وابتسمت بتلقائية اول ما فهمت حقيقة مشاعر جاسر ناحية براء وانه هو نفسه مش عارف حقيقة مشاعره دي،، ابتسمت منال وردت بحب وهي بتسمح دموع براء:

معقولة يا براء شايفة ان جاسر مش بيحبك ؟،، ده تصرفاته دي اكبر دليل انه محبش غيرك

اتصدمت براء من كلام منال وانها فهمت كلمة الحب اللي قالتها علي انه الحب فعلا اللي في قلبها ناحية جاسر وقلقت احسن تكون كانت كاشفة مشاعرها ناحية جاسر من بدري فقالتلها بتوتر وهي بتبص للارض:

احم،،هو حضرتك تقصدي ايه؟

ضحكت منال بخفة وهي بترفع وش براء بايديها وقالتلها بخبث:

يعني للدرجادي فاكراني مش عارفه انك بتحبي جاسر من زمان،،من يوم ما وعيتي عليه،، انا عارفة وملاحظة كل حاجة من بدري بس ساكتة لانه مش بايدي حاجة اعملها