رواية صاحبتي ضرتي كاملة جميع الفصول بقلم همس كاتبة
قولت وانا بعيط: يا بابا هبة خسرت الدنيا بعمايلها وخسرت الاخرة ربنا يسامحها
بابا: ادعيلها بالرحمة وقومي نعزي اهل سعيد، ده واحب برضو يا بنتي
قولت: يلا يا بابا
روحت وسبت البنات عند طنط ندى
طول الوقت بفكر ما فيش حد يعرف سر هبة غيري ، جايز تكون قالت لحد تاني، زعلت اوي مش مسدقة انه هبة تعمل كدة
حضنتني وعد اخت سعيد الكبيرة وعيطت بحضني جامد وبقت تقول بصوت عالي، حقك رجعلك والله الي حصل ده بسبب الي عملته بيكي
لكن كل الستات القاعدة بدأو يتكلمو على هبة
و انا بسمع كلامهم والستات عمالين يعلو بصوتهم
جات وحدة وقفت جنبي وقالت: ربنا قادر على كل شيء اهو خلصلك حقك
بصيت بيها بصدمة
وقولت بصراخ: بس بس اسكتو خالص، لا الحي بترحموه ولا المي.ت بتترحمو عليه، انتو ايه ؟؟؟قلبكم ده ايه ؟؟؟ حجر، ما بتحسوش، البنت بقت بايدين ربنا بدل ما تدعولها ربنا يرحما ويغفر لها عمالين تتكلمو عليها يا ناس حرا.م عليكم
مرت الايام الثلاثة كنت تعبانة وزعلانة على هبة
بس انا اقتنعت انه الزعل عمره ما هيفيد
قولت اركز على مذاكرتي الفترة دي
في يوم جالي اتصال من وعد اخت سعيد وقالت انه نفسها اوي تشوف البنات
لبست البنات ووديتهم مع السواق وبقيو يوم كامل هناك
كانت الامتحانات قربت خلاص
و شريف كان مهتم بيا اوي وعلى طول بياخد البنات يخرجهم عشان اقدر اذاكر براحتي
مرت الايام وخلصت امتحانات والنهاردة اليوم الي هتطلع بيه نتيجة تعبي الفترة الي فاتت
كنت قاعدة مع بابا وطنط ندى وشريف
شوية ولاقينا فارس وعياله جايين
قولت: وحشتني اوي يا حبيبي
مرفت مراته: بقولك يا بت يا ندى ان نجحتي احنا نروح الصعيد هنعملك احلا حفله هناك ونجوزك الجدع الي ابوكي قال عليه
بصيت ليها وعيوني مفتوحة وبصيت لشريف وابتسمت بفتور وقولت ؛ ميرفت حبيبتي انا مش هعمل حفلات ومش هتجوز الا بعد سنوية بنتي وعلى فكرة انا لسا ما اتخطبتش
مرفت: ايهي ليه كدا بس ده الجواز حلو اوي حتى اسألي اخوكي
فارس: ما خلاص بقا يا مرفت قصري لسانك
انا ضحكت من قلبي على هزارهم
فارس: ندوشة انتي انجحي بالاول وبعدها اعملك الي انتي عايزاه
بعد شوية
كنت قاعدة وبستنا على نار
خايفة اوي ما انجحش خايفة اهز ثقتهم بيا بس شريف كان مطمني اوي
شريف بصراخ: ندى ظهرت ظهرت النتيجة
قولت وانا قلبي مقبوض: ايه
شريف بفرحة: نجحتي
انا من فرحتي حضنته وهو حضني المرة دي
بعد شوية اتكسفت اوي وبابا ضحك وحضني وقال: عيب كدا يا ندى ما انتو لو اتجوزتو من ساعتها كان قولنا ماشي
قولت بكسوف: اسفة يا بابا
فرحت اوي اوي وشوفت الفرحة والفخر بعيون اهلي
قررنا نروح كلنا للصعيد عشان اهلي هناك يباركولي
روحت الصعيد وخدت البنات معايا و قعدنا كام يوم هناك اتبسطنا اوي و بعدها روحنا
بعد ايام
كانت خطوبتي انا وشريف
انا طول الوقت قلبي مش مرتاح، حاسة اني مش مبسوطة، خوفت اكون لسا بفكر بسعيد، لكن لا سعيد ما عادش ليه اثر بحياتي، لبست لبس حلو وقعدت بالصالة
مامت شريف بتريقة: نورتي يا عروسة، مش العروسة برضو
بصيت ليها وقلبت عنيا عنها وقولت: ايوة انا العروسة
قالت اخته اسمها ايمان: هي دي الي حار.ب الدنيا عشانها
و بدأت تتوشوش هيا ومامتها وانا كنت سامعة كلامهم بس ما اهتمتش خالص
بعد شوية لبسنا الدبل شريف كان مبسوط اوي وطاير عقله، عكسي تماما كنت مرعو.بة وخايفة وحاسة اني مش مرتاحة خالص
مامت شريف: مش شايفاها صعبة يا مدام ندى انك تربي بنتين صغار لوحدك
طنط ندى: مش فاهمة
مامت شريف: قصدي بعد ما يتجوز ابني الباش مهندس شريف من ندى بنت جوزك انتي هتربي بناتها لوحدك
بصيت ليها باستغراب كانت بتتك على الكلام وكأنها بتعلي ابنها عليا وكمان مش عايزاني اخد بناتي معايا
قولت بغرور واضح وبدون ما ابصلها: ابنك يا طنط عارف شروطي كويس قبل ما يطلبني وانا هاخد بناتي معايا وهربيهم
مامت شريف بزعيق: انتي بتقولي ايه انا لا يمكن اسمح بكدا
جيه شريف وبابا على صوتها
شريف: في ايه يا ماما
مامته: انا مش هقبل بالمهزلة دي خالص
و حملت نفسها وراحت وكذلك ايمان وباقي عيلته
شريف: انا اسف يا عمي انا اسف يا ندى انا هتكلم معاهم
قولت بعصبية: انا شروطي كانت واضحة يا شريف
