" حبيس الچحيم " بقلم محمد إبراهيم عبدالعظيم
وصلت لأوضة على يميني بعد ماسمعت صوت أنثوي بتتكلم من جوة ، وصوت تاني بتبادلها نفس الضحكة ، الباب ده الوحيد اللي كله خشب مافيهوش ازاز ، خبط خبطات متتالية على الباب ، مع اخر خبطة مني الصوت اللي جوة سكت .
رجعت لورا كان خطوة ومتأهب لان الباب يفتح وحد يطلع من جوة خصوصا اني سمعت صوت خطوات من جوة .
فضلت واقف شوية محدش خرج ، خبط تاني ، مافيش استجابة ، كنت متردد افتح الباب وادخل بس علشان اخلص من اللي انا فيه ده فتحت الباب ودخلت .
لما دخلت مالقتش اي حاجة جوة الاوضة ، اوضة على السرميك والتراب مغطي الارضية والحيطان كلها ! .
بس ازاي ، ازاي وانا سامع بودني صوت لاتنين بيضحكوا ومعاها صوت خطوات كعب واضحة اوي ، الريحة جوة الاوضة كانت مرڠبة .
كإني واقف في ترب بالظبط ! .
بس كان فيه كرسي في الاوضة دي ، الكرسي اللي بيتحرك لما حد يقعد عليه ويقوم ، ليه بقول كدا لانه كان على مرمى بصري بالظبط وكان ااااا ... وكان بيتحرك لقدام وورا ببطء !! .
وده معناه حاجة واحدة بس .. أيوة .. كان في حد قاعد قبل ما ادخل انا ، بس مين والاوضة ملهاش مخرج غير الباب اللي انا واقف قدامه ده ! .. والأهم فين الاتنين اللي سمعتهم بيضحكوا وبيتكلموا ؟
_ أستاذ .. يا أستاذ .. واقف عندك بتعمل ايه ؟.
أتنفضت من مكاني لما سمعت صوت خشن جاي من ورايا .
اتلفتله لقيت راجل في اواخر الستينات من عمره ، وشه مكرمش وباين عليه العجز بس كان لابس بالطو ابيض طويل ولابس جونتي .
_ انت بتعمل ايه هنا يا استاذ ، المكان ده للممرضات بس .
قولتله بعد ما اطمنت بوجوده نوعا ما :
_ أسف بس أنا سمعت صوت جاي من جوة الاوضة دي وكنت بس عايز اسال اي حد اخرج من هنا ازاي .. زي ما انت شايف الاسانسير طلع وكل ما ادوس على الزرار عشان ينزل مش بينزل ، اظاهر فيه مشكلة ، وطبعاً زي مانت عارف مافيش اي سلالم هنا.. لو سمحت ممكن تقولي اخرج ازاي .
كشر كدا وبص على مكان الاسانسير وقالي باستغراب :
_ مافيش سلالم ازاي ، ما السلالم جمب الاسانسير اهي .. انا لسه نازل من عليهم ، أنت بتتعاطى حاجة ؟ .
استغربت ومشيت شوية قدام ووصلت عند الاسانسير وقولت بصوت عالي عشان يسمعني :
_ فين دي يا حج انا مش شايف حا....
بصيت ورايا عليه ملقتهوش !! .. كل اللي لقيته باب الاوضة اللي في الوش بيتقفل بعد مكان مفتوح !! .
_ ياللي هنا .. حد يرد عليا .. ايه مافيش حد هنا .. يا دكتور .. يا جمااااعة .
فضلت انادي زي المجڼون وانا واقف مكاني بعد ما اتأكدت ان في حاجة غلط بتحصل حواليا .
_ يعني ايه .. مافيش حد هنا ولا ايييه .
بأعلى صوت عندي بدأت أتكلم ، وكان الشيء المتوقع انه يحصل ، محدش ظهرلي ، بس سمعت صوت الدكتور او مش عارف مين ده بالظبط اللي كان واقف معايا من شوية .
_ تعالى .. تعالى هنا عايزك .. ووطي صوتك شوية انت مش لواحدك هنا .
