" حبيس الچحيم " بقلم محمد إبراهيم عبدالعظيم
صوته كان جاي من الاوضة اللي ف اخر الممر ، مشيت في الطرقة علشان اروحله .
حاجة جوايا بتقولي بلاش ، بس رجعت اقول يمكن هو الحل الوحيد ليا اني اخرج من هنا واخلص بقى .
بدأت أتحرك بس وانا ماشي وقفت فجأة بعد لما شوفت باب اوضة من الاوض بيتفتح وبيخرج من جوة مريض لابس جلابيا قصيرة متوسخة نوعاً ما ومتربة وماسك المحلول بإيده ومتسند على عكاز بإيده التانية وبيمشي ببطء .
قولتله بعد مالقيته مش قادر يمشي :
_ ألف سلامة عليك .. أي خدمة طيب يا حج انا تحت امرك .
وقف ولف راسه وبص عليا ، فضل باصصلي شوية ، كنت حاسس مابين نظراته بلاشيء ، توهان وكانه مش باصصلي أصلا.
مكنش مدي أي تعبير على ملامحه ، ورجع راسه مرة تانية وكمل طريقة ولا كإني موجود ولا كلمته ولا هو سامعني أصلا .
اتحرك في صمت ودخل الاوضة اللي جمب الأوضة اللي خرج منها ، عذرته الصراحة ، قولت اكيد هو مش سامعني ، عنده مشكلة في السمع ، انا بقالي كتير بنادي ومحدش رد .
علشان كدا رجعت بضهري وبصيت من برة الأوضة اللي هو دخل فيها وسط الازاز لقيته قاعد على كرسي جمب سرير كانت موجودة عليه واحدة ست فاتحة عنيها على أخرهم وباصة للسقف .
لقيته بيقرب على ايديها وبيمسكها ، قولت اكيد دي مراته ، وانا بكلم نفسي لقيته باصصلي ! .
بصة بنفس الشرود والتوهان ، لقيته بدأ يقوم ويقرب على ودن مراته او الست اللي راقدة على السرير دي وبدأ وكإنه بيقولها حاجة وفي أخر كلامه شاور نحيتي !! .
إتحرجت وبعدت نظري عنهم بصراحة .. بمجرد ممشيت من قدامهم سمعت من جوة
الاوضة راديو بيشتغل على اغنية قديمة لعبدالحليم ، وبدأت أسمع أصوات دندنة .
_ إيه هتفضل واقف عندك كتير ؟ .
مشيت ودخلت عند الدكتور اللي لقيته بيقولي الجملة دي .. أول ماشفني قالي :
_ قبل ما تدخل مش عايزك تناف ، أنت في المشرحة واللي قدامك دي تلاجة الميتين .
اتسمرت في مكاني لما دخلت ، بعدها بدأ يضحك ورجع يقولي :
_ بذمتك هتخاف من ايه ولا من مين ، دول ناس في ملكوت الله يا ابني ، مستحيل حد منهم يأذيك ، عامله كدا بالظبط زي مبتروح الترب ، مين من الميتين هيضرك ولا ينفعك ، كان نفع نفسه وهو بين ايدين ربنا ، هما خلاص عملوا اللي عملوه في دنيتهم وميعادهم جيه واهم مستنين ..احنا كبني ادمين متقسمين لقسمين والاتنين بيستنوا ، في اللي بيستنى اجله وهو عايش وفي اللي بيستنى أجله بعد ميموت والاتنين بيتلاقوا يوم الحق .
استريحت من كلامه وضحكته البسيطة اللي على وشه ، علشان كدا حكيتله على اللي شوفته من اول مركبت الاسانسير لحد اللي حصل من لحظات ، كان قاعد على كرسي خشب والاوضة مافيهاش غير تلاجة متقسمة لأدراج كتير وكل درج فيه مكتوب اسم المـيټ ، الا درج واحد بس ، مكنش مكتوب عليه اسماء .
