سكريبت " أم مع إيقاف التنفيذ " بقلم شيماء الصيرفي
بصيتلها بنظرة يأس ممزوجة بسخرية
_ ليه توجعيني وأنتِ عارفة اللِ فيها.
_ صدقيني مقصدش اللِ فهمتيه، أنا مبتريقش عليكِ، دلوقتي في أدوية بتحفز إفرز الهرمونات الخاصة باللبن وتنزله؛ كان ليا صديقة بتعاني بسبب قله اللبن عندها، أخدت الدوا دَ وحفز اللبن جدًا.
_ بجد يا هاجر ولا بتقولي كِدَ وخلاص.
قولتها بترجي
_ أدخلي علىٰ جوجل واقرائي، هتلاقي كلامي صح، غير كِدَ أنا هكون كلي سعادة لما تشاركيني في ولادي وتربيهم بكلامك واسلوبك الجميل.
بصيتلها بنظره شكر وعيوني مليانه دموع.
_ أنتِ هدية كبيرة أوي يا هاجر ربنا هدانا بيكِ، أنتِ سبب بعد ربنا أن السعادة تدخل البيت دَ.
_ ربنا يديم المحبة بينا.
قالها جاسر واستائنف كلامه وهو بيبصلي بأمل
_ ان شاء الله بكرة نروح عند دكتورة وتبقى امهم بالرضاعة.
_إن شاء الله.
روحنا تاني يوم لدكتورة اللِ أكدت كلام هاجر، عطيتني دواء وقالتي الموضوع هيحتاج وقت بس مش كتير؛ بالفعل في أقل من شهرين كنت أمهم وهما بقوا ولادي، آه مخلفتهمش بس حسيت معاهم بالاحساس اللِ كان نفسي أحس بيه؛ لما كان حد منهم يحط إيده علىٰ صدري بحنان هو بياكل كنت بفضل أبوسه وأحمد ربنا علىٰ النعمة اللِ منّ علينا بيها.
كنت قاعدة بالولاد لما جاسر وهاجر راحوا يزورا حد من أهلها في المستشفى، بس استغربت لما لاقيت هاجر راجعة زعلانه وجاسر بيضحك وفرحان.
_ مالها هاجر.
جاسر بصلي بفرحة وهو بيضحك وقال
_ تعبت في المستشفى ولما كشفنا عليها طلعت حامل.
_ الله أكبر الله أكبر اللهم بارك، مُبارك يا هاجر ايوة كِدَ.
ضميتها بفرحة بس لاقيتها عيطت
_ مالك بتعيطي ليه؛ أوعى تكون زعلتها يا جاسر.
_ هي زعلانة عشان حامل والولاد.
_ طب تعالي اقعدي، حبيبتي الحمل دَ رزق من ربنا وهدية أهداكي بيها، المفروض تفرحي متزعليش ولو علىٰ الولاد هما ولادي، هيبقوا جوه عيوني متشليش هم، إن شاء الله تقومي بالسلامة وتجيبي أحلى نونو قمر زيك.
_ أنا زعلانة عشان لسه الولاد متموش سنة وكِدَ هفطمهم، صعبانين عليا أوي.
